في مغارة المِعْزَى
قصيدة ريفية قصصية غنائية بلهجة فلسطينية / مهداة إلى الشاعرة الرقيقة صفاء العناني بمناسبة أغنيتها
" يا طالعين عَ الجليل " مع مودّتي واحترامي .
للشاعر : سعود الأسدي
كتب الشاعر الأديب أحمد دحبور لدى مراجعته ديوان سعود الأسدي " شبق وعبق " في صحيفة الاتحاد في السادس من آب 1999 مقالة جاء فيها :
" يرسم سعود الأسدي ، بالكلام ، خريطة لهذه البلاد المجرّحة . ولأن أسماء مدنها وقراها تجعل الشجى يبعث الشجى ، فهو لا يكف عن ترداد الشاغور وبيسان وصفورية والطنطورة ، ويوقظ الراعية السمرا في مغارة المعزى ، ويصغي إلى كل زهرة ونوارة تهمس في بلادنا: الزقزقيا، والبرقوق ، والسوسن والنرجس والفيجن وتفاح المجانين والدوم . بل إن الكلمات العامية الراقدة بين حبات التراب وفي عروق الصخر ، تسترد عافيتها على يدي هذا الشاعر الصّنَاع ، فإذا بكل سنبلة في البيدر تميل على وقع الكلام الجليلي حتى إذا أتى دورها اهتزت ، وربت ، وأنبتت من كل زوج بهيج " .
الرّاعْيِه السّمرا اللي كانتْ سارْحَه
بْعنزاتْها وْمَرْقَتْ عليّ البارْحَه
وِالدّنيا تندفْ ثلجْ
عَ الجبلْ وِالمرجْ
قُلْتِلْهَا : تَعي !
وْما بين لأ وآ وْلَمِّنْا أجَتْ
فاتَتْ معي عَ مغارْة المعزَى
اللي في عِرْق الجبلْ ،
وْصرتْ هيكي بْلا وعي
أفِجّ بيدي النار
يللي مْعَسْعِسِه بكوم القَصَلْ ،
وَانزلْ عَ رِكْبِه ونُص نايِخْ عَ الوَطَا
وانْفُخْ على الجَمْرات
نَفْخ بْلا وعي !
والراعْيِه وهي مادِّه ديّاتْها
تْفَرْفِكْهِنْ من البرد وِتْوَحْوِح :
" أحّو يا بَرْدي "
وِالدّفا يْقُلْلا معي :
لا تِطْلَعي بَرّا المغارَه بْتِصْقَعي !
وْصُرْنا على نار القَصَلْ
بِمْغارْة المعزى اللي في عِرْق الجبلْ
نِقْزَعْ قشاقيش الحَطَب لِمْبَلَّلِه
وْننفخْ عليها هي وأنا ،
وِالمغارَه لَسَماها مْعَسِقْدِه ،
وْدُخّانها يُعْزُقْ كأنْها موقَدِه ،
وِعْيونْنا يْسِحُّوا دَمِعْ عَ خْدودْنا ،
وْنِشوي بهالبلّوط تا نشوفو استوى
وِنْصير نِتْنَقْرَشْ سَوَا
وْنِحكي حكايا للغِوَى ،
وْنرجس الوادي يميل عا ميل الهوى
ومع كل ميلِه يْقول للغابِه :
اسمعي !
وْظلّينا طول نهارْنا
وِالدّنيا ريح وثلجْ
وِقْطيطَه تِكْفِت لتحت ع أالمرجْ
غيم وندى ،
وْنحنا نغنّي للغِوَى
وْفيجن الوادي يميل عا ميل الهوى
وْمع كلّ ميلِه يْقول للرّيح :
اخشعي !
وْلَمِّنْها شمس الكون غَطْسَتْ
وِالمسا ظَبّ الرّمَسْ
وْظبّنا من تحت جِنْحان الأسى ،
شحرورة الخَلِّه
خَنْسَتْ بشي مَلِّه
وْشهقتْ قبِل ما تباتْ
أربع خمِس شهقاتْ ،
والراعيه من خوف ييجي الليل
والذّيابِه تْمَلِّي هالغابِه
قامتْ ولمّتْ حالها
وِبْخاطْرَك ..!
ألله مَعِكْ .. !
وِتْحوحي لعنزاتها :
" حو حو حو حو " ،
وْعنزاتْها شَلْعَه
مْدَقّرِه تِرْعَى ،
وْلَمِّن ما هيكي
من وراها سَرَّبوا
وْصوب المشاتي غرّبوا
مِشْيَت الذّيل الذّيل
وْهِيْ عَ كْتافْها
والدنيا تندفْ ثلْج
راشِّه مْشَمَّعي ..
وفي باب لِمْغاره
لَمِّن الراعيه أبْعَدَتْ
ظلّيت واقفْ صافن بحالي
وْاسمع صدى الوادي
عَ الراعيه يْنادي
وِيقول إلها بْزاتها
وهي مْسرّبِه بْعنزاتها :
وينك يا حلوِه ؟
وين إنتي ؟
شو مَعِكْ ؟
إنتي أنا
وِكْ وين رُحْتي
شو معي ؟!
وْلَمِّن مَ حَدِّش رَدّ
رِجْع الصّدَى ثاني
يْنادي بِلْساني :
يا نجمِه !
يللي من ورا الغيمِه اطْلَعي !
وقولي لهالبنت الحنونِه الراعيه
وِكْ وين رحتي ؟
إرجعي !
كل يوم عَ الميعاد زاتو إرجعي
في البَرْد يا بنت ارجعي
نارِكْ معي بتهبّ وبتطفي معي
في الشّرْد يا بنت ارجعي
بِتْبوردي بِتْشَبِّعيني بْتِشْبَعي
في الضوّ في العتمِه ارجعي
مع رفّة جفوني ،
مع رمشة عيوني ،
مع لمس ديّاتي ،
مع همْس حسْراتي ،
مع نفس ريّاتي ،
مع " أوف " ناياتي ،
مع حزن ألحاني ،
مع نبض شرياني ،
مع غيم وجداني ،
وِكْ أرجعي !
وك إرجعي !
وك إرجعي!
ــــــــ
مادّة ديّاتها : مادّة يديها.
عَسْعَسَت النار : بدأت تشتعل ببطء مصحوب بدخان .
القَصَل : أعقاب القشّ .
الوطا ( الوطاة ) : الأرض .
القشاقيش : أعواد الحطب الدقيق .
معسقدة : مدخّنة .
يعزق : ينبعث باندفاع .
نتنقرش : نأكل تسلية .
قطيطة ( غطيطة ) : ضباب .
فيجن : نبتة لها رائحة ساطعة ،
يرش ورقها على الزيتون الأسمر المكبوس لتطييبه .
ظبّ الرّمس : وقت امتداد الظلام غبّ غروب الشمس .
تحوحي لعنزاتها : تناديها وتنتهرها.
مدقّرة ترعى : من غريب ما رواه الرعاة أن الماعز تشعر
سلفاً في الأيام الماطرة ( أيام اللزبات أو الزربات ) بان
الراعي لن يخرج بها إلى المرعى في الغد لشدّة المطر لذا
فهي تدقّر في الأرض جادة في رعي العشب والقش وأوراق
الشجر لملء بطونها ليومين وأكثر .